கவி அழகன்

உடலுக்குள் அசுத்தமா உலகமே அசுத்தமா

2012-02-04T15:15:00.000+05:30

மூச்சு காற்று

உடல் பரவி திரும்பும்

அசுத்த காற்று

உடலுக்குள் அசுத்தமா

உலகமே அசுத்தமா

அசுத்த உலகில்

சுத்த காற்றை

மூக்கு துவாரம்

வடிகட்டும்

மனித உடம்பில்

சுத்த காற்று

அசுத்தங்களை

வெளித்தள்ளும்

உடலுக்குள் அசுத்தமா

உலகமே அசுத்தமா

அசுத்த ஆட்சிகள்

சுத்தத்தை அசுத்தமாகி

வெளுத்து கட்டும்

சுத்தங்கள்

சுத்தமாக வாழமுடியாமல்

அசுத்ததுக்குள்

சுத்தம் தேடும்

சுத்தங்களின் சுவையை விட

அசுதங்களின் சுவை அதிகம்

அதிகாரம் கையில் இருந்தால்

அசுத்தங்களெல்லாம் சுத்தம்

சுத்தமான கீழ்தட்டு

அசுத்தமாக வாழ்வதும்

அசுத்தமான மேல்த்தட்டு

சுத்தமாக வாழ்வதும்

மரணித்த மனிதங்களின்

உலகமயமான உலகு

என்பதை உறுதிப்படுத்தும்

புதைந்துபோன ஆசைகள்

2012-01-30T12:17:00.000+05:30

காத்திருக்கிறது மண்

ஒரு விதைக்காக

காத்திருக்கிறது நீர்

ஒரு துளிர்க்காக

காத்திருக்கிறது பனி

ஒரு இலைக்காக

காத்திருக்கிறது வண்டு

ஒரு மலருக்காக

காத்திருக்கிறது காதல்

ஒரு மலர்க்கொத்துக்காக

காத்திருக்கிறான் இறைவன்

ஒரு மாலைக்காக

காத்திருக்கிறது சூரியன்

அதை சுட்டெரிப்பதற்க்காக

காத்திருக்கிறேன் நான்

கூந்தலில் சூட்டுவதற்க்காக

யாருக்காக அந்த மலர்

காத்திருக்கிறது

யாருமே கேட்பதில்லையே

புதைந்துபோன ஆசைகள்

சோடி சேரும் நாளை எண்ணி

2012-01-22T18:08:00.000+05:30

உன் ஈர விழியில்

ஒரு துளி

நான் ஏங்கி தவிக்கிறேன்

தனிமையில்

என் தனிமை தாங்கும்

மர நிழல்

உன் சோகம் சொல்லும்

கார்முகில்

ஊஞ்சல் ஆடும்

இருமனங்கள்

சேர துடிக்கும்

இரு நிறங்கள்

பாசத்தோடு

அருகில் இருந்து

உச்சி நெத்தி கோதும்

உண்மை காதல்

கரம் பிடித்து

இதழ் குவித்து

சோடி சேரும்

நாளை எண்ணி

காதல் செடிக்கு கண்ணீர் வேண்டாம்

2012-01-07T09:50:00.000+05:30

இளமை வாழும்

இனிய மலர்கள்

பனியைத் தாங்கி

பூத்து குலுங்கும்

இதமாய் விரியும்

ஒவ்வொரு இதழும்

மென்மை சேர்த்து

இதயம் வருடும்

சுவாசம் பட்டு

வாடும் வதனம்

முத்தம் வாங்க

ஆசை கொள்ளும்

வெப்பம் தாங்கா

மடியும் பெண்மை

நெஞ்சில் சாய

ஏங்கி நிற்கும்

பூக்கும் செடிக்கு

தண்ணீர் ஊற்றி

குளிர்மை காக்கும்

பணியை செய்வோம்

காதல் செடிக்கு

கண்ணீர் வேண்டாம்

கண்கள் சிரிக்க

காதல் கொள்வோம்

ஏங்கி துடிக்கும் இரு இதயங்கள்

2012-01-01T08:46:00.002+05:30

ஓடி ஒழிந்த வருடங்கள்

ஓராயிரம் நினைவுகள்

சேமித்து வைத்த கனவுகள்

மீட்டலை மீட்கும் வகுப்புகள்

தொட துடிக்கும் மனசு

தொடருகின்ற நினைவு

சேர்த்துவைத்த பரிசுப்பொருள்

பரிமாறிய வாழ்த்து அட்டைகள்

பாசத்தின் உண்மைகளை

பறைசாற்றும் பல்லவிகள்

பார்க்காமல் இருந்தே

பழகிப்போன உணர்வுகள்

கூட்டாக சேர்த்து வைத்து

கொண்டாட காத்திருக்கும்

சந்தோஷ நாளை எண்ணி

ஏங்கி துடிக்கும் இரு இதயங்கள்

தூரத்து நிலவு

2011-12-18T11:18:00.003+05:30

நிலவை விரைவில்

மறைய கேட்கிறான்

உன்னை அருகில் பார்க்கும்

நாளை எண்ணி

************

நிலவை துடிக்கவைக்கிறேன்- என்

உயிரை கொடுத்து

கனவிலும் நான்

காதலிப்பதற்கு

************

தூரத்து நிலவின்

பாசத்துக்கு ஏங்குகிறேன்

அருகிலிருக்கும் நட்சத்திரங்கள்

எனக்கு நெருப்பு கொள்ளிகளே

****************

நிலவைத்தொடும் விரலை

முந்தி நிற்க்கும் நிகங்கள்

கனவில் வந்து கிழிக்கும்

காதலின் கத்திகள்

என் சந்தோசத்தை யாரிடம் கொடுத்தது

2011-12-11T16:04:00.000+05:30

சிவப்பு நிற வாழ்க்கை

தனிமையோடு வேதனை

பிரிவை தாங்கா மனதினில்

தனிமை தாங்கும் சோதனை

உறவுகள் வேண்டி உலகினில்

தனிமரம் தோப்பு அவதற்கு

தேடிய ஆணிவேர் அறுந்தது

காய்த்திட்ட கனிகளோ விழுந்தது

வறண்ட கருங்கல் பாறையில்

மோதும் எந்தன் நினைவுகள்

இரத்தம் சிந்தி விழுகிறது

எழும்ப முடியாது துடிக்கிறது

சுழல்வது இந்த பூமியெனில் - என்

வாழ்கையும் ஏன் சுழல்கிறது

கொடுப்பது எல்லாம் கடவுள் எனில் - என்

சந்தோசத்தை யாரிடம் கொடுத்தது

கஷ்டத்தின் பின் சிரிப்பு

2011-12-04T08:54:00.002+05:30

நிலம் உடைத்து

முளை வெடித்து

துளிர் எழுப்பும்

பயிர்கள்

கன மழையை

சுடு வெயிலை

தாங்கி வளரும்

இலைகள்

நீர் இறைக்க

மண் பதப்படுத்த

பயன் தரும்

விளைச்சல்

பட்ட துன்பம்

கடந்த நேரம்

மறந்து போகும்

முகத்தில்

பிணமாய் வீழ்ந்தோம் மண்ணை காக்க

2011-11-27T12:10:00.001+05:30

இதயம் விதைத்தோம் ஈழம் பிறக்க

கனவை வளர்த்தோம் காலம் முழுக்க

புயலாய் எழுந்தோம் புருவம் உயர்த்த

புழுதியில் விழுந்தோம் துரோகம் ஜெகிக்க

மூச்சை இழந்தோம் முதுகில் குத்த

பேச்சை இழந்தோம் சிறையில் அடைக்க

சாக துடித்தோம் மண்ணை அணைக்க

சாபம் பெற்றோம் தமிழ் மண்ணை இழக்க

வேள்வி செய்த்தோம் வெற்றி எடுக்க

வெட்ட வீழ்ந்தோம் காட்டி கொடுக்க

நம்பி இருந்தோம் உதவி கிடைக்க

நாயை அலைந்தோம் அவர் கையை விரிக்க

இனமாய் அழிந்தோம் மானம் காக்க

பிணமாய் வீழ்ந்தோம் மண்ணை காக்க

நினைவாய் சுமக்கிறோம் ஈழம் வெல்ல

எழுந்து நிப்போம் வெற்றி பிறக்க

சேர்ந்திட துடிப்பது காதல் இதயம்

2011-11-17T08:54:00.000+05:30

உயிருக்குள் உயிரான உறவே - என்

உறவுக்குள் தாயான அமுதே

நிலவுக்குள் ஒளியான அழகே - நீ

நினைக்கின்ற காதல் இனிதே

பிறக்கின்ற போது நீ குழந்தை - காதல்

பிறந்திட்ட போது நீ குமரி

கலக்கின்ற போது என் மனைவி

கடைசிவரை நீயே என் துணைவி

தொடங்கிட்ட போது காதல் இளமை

தொடர்கின்ற போது காதல் இனிமை

புரிகின்ற போது காதல் வாழ்க்கை

புன்னகையே நீ காதல் சேர்க்கை

அருகினில் இருப்பது என்றும் அன்பு

அடிக்கடி நினைப்பது இரண்டும் மனசு

சேர்ந்திட துடிப்பது காதல் இதயம் - கை

கோர்த்திட வேண்டும் என் தெய்வம்

இலட்சியம் என்பது வேசங்கள்

2011-11-13T16:08:00.000+05:30

இலக்குடைந்த

பயணங்கள்

பாதை தோறும்

பள்ளங்கள்

இடர் நிறைந்த

வாழக்கையில்

இலட்சியம் என்பது

வேசங்கள்

பசி நிறைந்த

மேனியில்

உயிர் பிழைக்கும்

மூச்சுக்கள்

உடல் களைத்து

உழைத்தாலும்

சொற்பமாக வரும்

காசுகள்

உடல் விரும்பி

உளம் விரும்பி

துணை விரும்பி

குழந்தைகள் - அவர்

மனம்விரும்பி

நடப்பதற்கு

மரணத்தை தொடும்

வேலைகள்

உலகை படைத்தான்

உயிரை படைத்தான் - ஏன்

வறுமை படைத்தான்

இறைவன் - அந்த

விடையை தேடி

ஓடி ஓடி

உயிரை மாய்க்கும்

ஏழைகள்

வெட்கம் இன்றி வெளிநாடு வந்து

2011-11-06T11:30:00.001+05:30

நீல வானில் வெள்ளை மேகம்
நீந்தி திரியும் பஞ்சுக்கூட்டம்
திரத்தி சென்று சேரும் நேரம் - நான்
காதல் கொண்ட கதையை சொல்லும்

உயர மரத்தில் ஒற்றைக்குருவி
ஊரூ முழுக்க பாட்டு சொல்லி
சிறகடிக்கும் காலைப்பொழுதில் - என்
மனசு முழுக்க உவகைகொள்ளும்

கூதல் காற்றில் உடல் விறைத்துப்போக
இரட்டைப்போர்வையை இழுத்து மூட
வெட்க்கப்படும் நினவுத்தோட்டம்
வேர்த்துக்கொட்டும் இருமனசுக் கூட்டம்

காலைப்பொழுதில் கடைக்கு சென்று
பாலும் வெதுப்பியும் வாங்கிவந்து
சூடாய் கோப்பி குடிக்கும் போது - அவள்
ஸ்பரிசம் என்று நா உணர்ந்துகொள்ளும்

சொந்தம் விட்டு வெளிநாடு வந்து
இரவை மறந்து உடல் உழைக்கும் போது
பட்ட துன்பம் மாறிப்போகும்
தொலை பேசி ஓசை கேட்க்கும்போதே

கடவுள் காதலுக்கு போட்டுவிட்ட மாலை

2011-10-30T12:14:00.000+05:30

நினைவு தேடி ஓடுகின்ற நெஞ்சம்

நிழலைக்கூட காதலிக்கும் உள்ளம்

இடைவெளிகள் கொடுமை செய்யும் காலம்

எப்பொழுது இரண்டும் ஒன்று சேரும்

நிலவை பிரிந்து வாழ்வதிங்கு கொடுமை

மன்னன் காதலுக்கு வந்ததிங்கு வறுமை

கடலும் வானும் தூரமான போதும்

மலை நீரின் மூலம் தொடுவதிங்கு இனிமை

மேகம் கலைந்த இருண்ட வானில் கனவு

காதல் பூக்கள் கொண்டு மாலை சூடும் வயது

வேள்வி தொடங்கி காலம் நூறு கடந்தும்

காத்திருக்கும் வாழ்வு ஒரு சாபம்

காதல் மட்டும் வாழுகின்ற உலகில்

தேடல் கொண்டு காதலித்த பொழுதில்

காத்திருப்பின் கொடுமை செய்யும் வேலை

கடவுள் காதலுக்கு போட்டுவிட்ட மாலை

தலைவா உனக்கு நன்றி சொல்ல

2011-10-23T11:20:00.001+05:30

தலைவா உனக்கு நன்றி சொல்ல

தலைவா உனக்கு நன்றி சொல்ல
தவமிருப்பேன் தனியாக
விரைவாய் உன்னை காண்பதற்கு

விழித்திருப்பேன் பகலாக

சுகமாய் உனக்கு சுகம் தரவே

இனித்திருபேன் கனியாக

நிறைவாய் உன்னை மகிழ்விக்க

மறந்த்திடுவேன் நான் உயிராக

கனவாய் நான் காத்திருக்கிறேன்

கண்களில் ஏக்கம் சேர்த்திருக்கிறேன்

விரல்களில் ஸ்பரிசம் தேடிநின்று

சிந்தை முழுக்க சிலிர்த்திருக்கிறேன்

படைகளின் வீரம் கொண்டவனே

பகைகளை அடக்கி ஆள்பவனே

மெதுமகள் மேனி தொடுவதற்கு

உன் கருணையின் கண்களை திறந்துவிடு

சுறுசுறுப்பை சொல்லிவிடும்

2011-10-16T13:07:00.000+05:30

சாளரத்தின் சேலையை

சற்று நான் திறக்கையில்

வெட்கம் கொண்டு காலைப்பொழுது

கட்சிதமாய் விடிகிறது

போர்வை விலக்கி குயில்கள் கூவ

பனி நீரை எடுத்து இலைகள் மூள்க

சோம்பல் முறித்த சூரியானோ

ஆம்பல் கண்ணை திறக்கின்றான்

சாலையில் வாகனம் ஊர்வலம் செல்ல

சடுதியாய் மஞ்சள் சிவப்பு சமிஞ்சை விழ

மனசு ஒருமுறை நிற்கிறது

மறுபடியும் ஏதோ நினைக்கிறது

வேகநடை இரண்டு கால்கள்

பறந்து செல்லும் நாலு சில்கள்

சுறுசுறுப்பை சொல்லிவிடும் - நான்

முழுஇரவு பணிமுடித்து திரும்பும்போது

விடியலை காண துடித்திடும் நினைப்பு

2011-10-10T08:34:00.000+05:30

கண்ணை மூடும் கருப்பு வாணம்

வெள்ளை குளமாய் வட்ட நிலவு

சிந்திக்கிடக்கும் சில்லறை விண்மீன்

சிலிர்க்க வைக்கும் சிக்கன காற்று

அடங்கிப்போகும் அவசர உலகம்

ஓய்வு எடுக்கும் இடைவெளி நேரம்

குடும்பம் கூடும் நிலவு முற்றம்

ஊரை கெடுக்கும் குடிகாரன் சத்தம்

குறைகளை சொல்லும் மனைவியின் நேரம்

தேவையை கேட்க்கும் பிள்ளையின் சிணுங்கள்

கணக்கு பார்க்கும் அப்பனின் மூளை

போர்வைக்குள் அடங்கும் இயலாமை யுத்தம்

தலையணை மந்திரம் சொல்லிடும் இரவு

தரணியை ஆள போட்டிடும் கணக்கு

கனவுகள் கண்டு மகிழ்ந்திடும் மனசு

விடியலை காண துடித்திடும் நினைப்பு

வழமைபோல் காலை விடிந்திடும் வேளை

வாடிய முகத்துடன் இன்னொரு நாளை

தேடியே போவான் குடும்பத்துத்தலைவன்

தேவைகள் தீர்த்தால் அவன் அன்று இறைவன்

அத்தை மகள் சுவைதானோ

2011-09-25T10:54:00.000+05:30

நெஞ்சினிலே தஞ்சம் கொள்ளும்

தேவதை இவள்தானோ

கண்களாலே கவிதை சொல்லும்

அத்தை மகள் சுவைதானோ

கேள்வி குறியாய் கெஞ்சிநிக்கும்

வஞ்சிக்கொடி இடைதனோ

வேண்டும் என்றே கொலை செய்யும்

இதழ் இரண்டும் மலர்தனோ

அள்ளி அணைக்க சொல்லிநிக்கும்

அடக்கமான மெல் உடல்தானோ

அமைதிக்கு விலை பேசும்

வட்டநிலா முகம்தானோ

கற்பனை தரும் கவிதைகளில்

காதல் சொல் இவள்தானோ

கடைசிவரை கூடவரும்

அன்பு காதலன் நான்தானோ

காதல் கடவுள் மட்டும் கல்லு

2011-09-18T11:44:00.000+05:30

பரந்தவெளி வானம்

பரவிக்கிடக்கும் மேகம்

சிதறிக்கிடக்கும் நட்சத்திரம்

சிரித்து பேசும் வெண்ணிலா

அழுது வடிக்கும் மழை

அழகாய் பிடிக்கும் குடை

ஓடித்திரியும் வெள்ளம்

நிரம்பி வழியும் உள்ளம்

பச்சைக்கடல் வயல்

பாகம் பிரிக்கும் வரப்பு

முத்து முத்தாய் நெல்லு

வெள்ளை நெல்லாய் அவள் பல்லு

கரையை கழுவும் கடல்

நுரையை பருகும் மணல்

ஓடித்திரியும் நண்டு

தேடித்திரியும் என் மனது

பனைமரம் விழுந்த வீதி

இரு மருங்கிலும் புல்லினச்சாதி

விரிந்து ஒடுங்கிடும் கண்கள்

அவள் வீட்டுக்கு போகும் கால்கள்

முளை நிமிர்ந்த கோவில்

மடை திறந்த கருணை

கல்லு முழுக்க கடவுள்

காதல் கடவுள் மட்டும் கல்லு

மோக போதை நகரம்

2011-09-11T10:15:00.002+05:30

படபடக்கும் இயந்திர இதயம்

பெருமூச்சு விடும் புகைபோக்கி

உழைத்தால் தான் உயிர்பிழைகமுடியுமென

தயார்படுத்தும் மனிதவலு நகரம்

காலைக்காய் கண்மூடி காத்திருந்து

கூட்டை விட்டு பறந்துபோகும்

பறவைகளாய் மனிதர்

உலகுடன் போராட வியர்வைசிந்தும்

இறுகிய முகங்கள் கொண்டு

இதிகாசம் படைப்பதாய் எண்ணி

உடல் உழைப்பை உறிஞ்சவிடும்

ஊமையாகும் எலும்புக்கூடுகள்

மகிழ்ச்சிக்கு வடிவமைக்கபட்ட

மது மாது பாணக்கடைகளிலே

உதடுருஞ்சி உடல் குளுங்கி

உற்சாக மோகம் கொள்ளும்

குடும்ப உறவை காட்டுவத்தில்லை

குழந்தை அன்பை பேசுவதில்லை

குடும்பம் என்றால் வளர்ச்சிக்கு

தடைவிதிக்கும் படிக்கல் என்றும்

தனியாக பிரித்துவைக்கும்

தனக்கென்றே தயார் படுத்தும்

புரட்சி என்று சொல்லிகொன்று

மனிதத்தை அழித்திவிடும்

ஊரை விட்டு நகரம் வந்து

உலக வணிகத்தில் உருண்டுபிரண்டு

வயதாகி நரை வந்தததும்

குடும்ப உறவை தேடிச்செல்லும்

நகரம் என்பது நரகமாகி

துயரம் தரும் சிகரமாகி

ஊர் நினைப்பை அழித்துவிட்டு

பணத்தை காட்டி போதை செய்யும்

அவசரத்தில் விடிந்த அதிகாலை

2011-09-04T12:01:00.000+05:30

கரும்பறவை சிறகடித்து

வானவெளியில் பறக்க

சிறு கீற்றாய் சூரிய ஒளி

உலகம் எங்கும் பரவ

வெட்கம் கொண்ட மேகக்கூட்டம்

விலகியே ஓடிவிட

புலர்ந்தது காலை

புதுப்பொழிவுதர

இடை நெளிந்து உடல் வளைந்து

நிமிர்ந்து நிற்க்கும் மரங்கள்

உரிமையோடு உட்கார்ந்து

இசைபடிக்கும் குயில்கள்

அழகுடனே தலையசைத்து

மலர் தூவும் இலைகள்

அதிகாலை பொழுதுக்கு

அர்ச்சனை தூவும் குருக்கள்

ஊருக்கு குறுக்கே ஓடும்

கறுப்புத்தார் ரோட்டு

உடல் முழுக்க ஈரமாகி

தலை குனியும் புல்லு

நீட்டி நிமிர்ந்து நிற்க்கும்

அணையாத மின்கம்பம்

புலர்கின்ற காலைக்கு

தீபமிடும் பூசாரி

ஆங்காங்கே அசையத்தொடங்கும்

மனித வலுக்கூ ட்டம்

அவர்களை ஏத்திச்செல்லும்

வாகனங்களின் சத்தம்

ஒருக்காலும் நின்றதில்லை

நிதானமாய் பார்த்ததில்லை

அழகாக புலர்கின்ற

அதிகாலை பொழுதுதனை

செங்கொடி வெந்ததோ தீயினில்

2011-08-30T18:30:00.004+05:30

உன்னையே கொன்று

எம்மை கொல்கிறாய்

உயிர்களை மதித்தே

உன் உயிரினை விட்டாய்

எப்படி நியாயம்

நீ செய்தது

உன்னை பெத்தவளுக்கு

பொறுப்பு யாரது

ஈழத்து நெஞ்சங்கள்

ஒரு போதும்

உயிர்பலி கேட்க்க

இல்லையம்மா

நாம் நொந்தது போதும்

செங்கொடியே

இவள் செய்தது வேண்டாம்

எம் இனமே

நட்பு

2011-08-21T10:09:00.001+05:30

நீ சிரித்தால்

நட்பும் சிரிக்கும்

நீ அழுதால்

நட்பு துடிக்கும்

நீ நடந்தால்

நட்பும் நடக்கும்

நீ விழுந்தால் - (நட்பு)

கை கொடுக்கும்

நீ உயர்ந்தால்

நட்பு மகிழும்

நீ மறந்தாலும் - (நட்பு )

உன்னை நினைக்கும்

நான் வருவேன் மறுமுறை

2011-08-14T12:16:00.000+05:30

மீண்டும் ஒருமுறை என்

மண்ணை மிதித்திட

வேண்டும் விடுதலை

நான் ஆண்ட பூமியை

தோண்டி பார்த்திட

வேண்டும் பலமுறை

நான் விட்டு வந்த

சொந்த பந்தங்கள்

செத்தது எதுவரை

அவர் வீர எலும்பினை

தேடி எடுத்து

தேடவேண்டும் உறவினை

அன்னை மடியினில்

தலை சாய்ந்த வயதினில்

மறந்தேன் உலகினை

என்

அன்னை மண்ணிலே

தலை சாய்த்தபோது

இழந்தேன் உலகினை

உண்மை மகனாய்

ஒற்றை மகவாய் - என்ன

செய்தேன் இதுவரை

பெற்ற தாயையும்

சொந்த மண்ணையும்

விட்டேன் அது குறை

கூடி குழாவி

கும்மி அடித்த

உறவுகள் உள்ளீரோ

ஒருவர் இருந்தாலும்

தந்தி அனுப்புங்கள்

நான் வருவேன் மறுமுறை

தமிழ் அன்னையின் கதறல்

2011-08-07T00:25:00.002+05:30

டிஸ்கி - ஈழதமிழ் சமுகத்தின் முதுபெரும் புலமையாளர் பேராசிரியர் கார்த்திகேசு சிவத்தம்பி அவர்கள் மறைந்தது ஒருமாதம் ஆகின்றது அதை முன்னிட்டு

தமிழுக்கு பிறந்தவனே

தமிழோடு வளர்ந்தவனே

தமிழுக்குள் ஆய்வு செய்து

தமிழையே வளர்த்தவனே

நீ இன்றி தமிழ் இல்லை

தமிழ் இன்றி நீ இல்லை

உலகத்தில் தமிழ் மொழியை

தலை நிமிர்த்திய என் பிள்ளை

இயல் இசை நாடகத்தில்

இயல்புடனே இசைந்தவனே

நாட்டுப்புற நாடகத்துக்கே

நாட்டாமை ஆனவனே

சமூகவியல் பொருளியலில்

அறிவுத்திறன் கொண்டவனே

மாக்சிச கொள்கையிலே

மாறாமல் வந்தவனே

பர்மிங்காம் பல்கலையில்

தமிழ் கற்க சென்றுவிட்டு

நீ செய்த ஆய்வினால்

தமிழ் உன்னை கற்றதடா

இலக்கணங்கள் இலக்கியங்கள்

எடுத்தவுடன் பறந்து வரும்

நீ எழுதிய புத்தகங்கள்

நினைக்கவே தமிழ் வளரும்

கைலாசபதி மௌனகுரு என

தமிழ் நட்பு கொண்டவனே

பிழையென்றால் நேரே சொல்வாய்

கலைஞ்ஞசருக்கே மறுப்பு சொன்னாய்

தமிழில் உள்ள பற்றுனாலே

மண் மீது காதல் கொண்டாய்

தமிழருக்கு தீர்வு காண

அரசியல் கொள்கை கொண்டாய்

தமிழ் துறையில் நீ தலைவன்

புத்தகத்தில் நீ புலவன்

எத்தனை பேருக்கு உன்கையால்

தமிழ் பால் கொடுத்திருப்பாய்

ஈழத்தமிழ் சமுகத்தின்

முது பெரும் முனைவரே

காலத்தின் கட்டளையால்

கண் மூடி விட்டாயே

கதறுவது மக்களல்ல

தமிழ் மொழியும் கூடத்தான்

பிரிந்தது நீ அல்ல

தமிழ் சிறப்பும் சேர்த்துதான்

மிக்சி - கலைஞ்ஞருக்கே மறுப்பு சொன்னாய் - செம்மொழி மாநாட்டுக்கு பேராசிரியர் கார்த்திகேசு சிவத்தம்பி அவர்களுக்கு அழைப்பு வந்ததும் கலைஞ்ஞர் கருணாநிதியிடம் ஈழத்தமிழர் பற்றிய தெளிவான கொள்கை இல்லை ஆதலால் கலந்துகொள்ள மாட்டேன் என மறுப்பு கடிதம் அனுப்பியவர்

இறுதி சேர்க்கை

இவர் கடைசியாக கலந்து கொண்ட சர்வதேச மாநாடு, கோவையில் நடைபெற்ற உலகத் தமிழ் செம்மொழி மாநாடுதான். இந்த மாநாட்டுக்கு அவர் வருவது பெரும் சர்ச்சையைக் கிளப்பியது. இருப்பினும் தமிழுக்காக செல்கிறேன் என்று கூறி கலந்து கொண்டார்.

இவர் மறுப்பு கடிதம் அனுப்பியதும் உண்மை கலந்து கொண்டதும் உண்மை

தவறுக்கு வருந்துகின்றேன்

நன்றி காட்டான்

பொக்கிசமான நினைவுகள்

2011-07-31T22:15:00.002+05:30

கனவுகள் வரும் இரவுகளில்

காதலி தரும் உணர்வுகள்

விழிகளில் விழும் ஸ்பரிசங்களில்

விலகிட முடியா தருணங்கள்

அணைத்திட துடிக்கும் கைகளில்

அன்பினில் விளைந்த வித்தைகள்

விதிகளை மீறும் காதலில்

உலகினை மறந்த உண்மைகள்

உயிருடன் உயிர் பேசிடும்

உத்தரவில்லா தொடர்புகள்

உறங்கிடும் போது வரைந்திடும்

பத்திரமில்லா சொத்துக்கள்

விரைந்திடும் கால ஓட்டத்தில்

இணை பிரியாத உறவுகள்

தொடர்ந்திடும் வாழ்க்கை பயணத்தில்

பொக்கிசமான பல நினைவுகள்

காதல் சுகம்தரும் காதலனாய்

2011-07-24T11:29:00.000+05:30

நிலவொன்று விழுந்ததோ

பூமியில்

நிஜ அழகொன்று படர்ந்ததோ

மேனியில்

கண்கொண்டு பார்கையில்

சிலிர்க்கிறேன்

காதல் வளர்பிறையாக

உயிர்க்கிறேன்

கனவொன்று தெரிந்ததோ

கண்களில்

இமை கண்மூடி திறந்ததோ

நாணத்தில்

விரல் கொண்டு தீண்டையில்

குளிர்கிறேன்

வளைந்தோடும் நதியாக

பாய்கிறேன்

இதழொன்று விரிந்ததோ

பூவினில்

கரு வண்டொன்று அமர்ந்ததோ

உதட்டினில்

சுவைதேடி செல்கையில்

இனிக்கிறேன்

காதல் சுகம்தரும் காதலனாய்

வாழ்கிறேன்

என் காதல் குழந்தையே

2011-07-17T09:05:00.000+05:30

இதயம் முழுக்க துடிப்பதெல்லாம்

உந்தன் காதலே

இமைக்கிடையில் கண்கள் இல்லை

காதல் பூக்களே

வருடம் முழுக்க நாட்கள் இல்லை

உன்னை போலவே

வாசமுள்ள ரோஜா கூட

காதல் சொல்லுமே

எண்ணம் முழுக்க உன்னைப்பற்றி

மட்டும் நினைக்குதே

கண்ணும் கண்ணும் மோதிக்கொள்ள

ஆசை கொள்ளுதே

உதடுகள் இடையில் வருவதெல்லாம்

காதல் சொற்களே

தீர்ந்து போன பேனா கூட

காதல் சாட்சியே

வாழ்த்துமடல் அனுப்பிவைக்க

கவிதை எழுதினேன்

வார்த்தை இன்றி காதல் மட்டும்

முந்தி வருகுதே

நெஞ்சுக்குள்ளே நிறைய காதல்

பொதிந்து கிடக்குதே

எழுதக்கூட முடியவில்லை - என்

காதல் குழந்தையே

ஏங்கிநிற்பாள்

2011-07-10T10:28:00.005+05:30

மாலைக்கருக்கள் மயங்கும்வேளை

மனசு முழுக்க ஏக்கம் தாங்கி

வாசல் கதவில் காத்துநிற்பாள்

கணவன் வருகைக்காய் ஏங்கிநிற்பாள்

ஓடும் மணிக்கூடு நேரம் சொல்ல

ஒவொன்றொவொன்றாய் அடுக்குப்பண்ணி

சூடாய் தேநீர் போட்டுவைப்பாள்

சூடு ஆறாமல் பாதுகாப்பாள்

வேலைப்பழுவில் சோர்ந்து விழுந்து

பாரப்பையை தோளில் சுமந்து

வீட்டு வாசலில் காலடி வைக்க

ஓடிவந்து கட்டி அணைப்பாள்

வேலைப்பையை வாங்கி வைப்பாள்

வேண்டுமென்றே சிணுங்கி முழிப்பாள்

சட்டைபொத்தானை கழட்டிவிட்டு

நெஞ்சில் தானாக சாய்ந்துகொள்வாள்

ஒருமுறை தூக்கி சுற்றிவிட்டு

உச்சி முகர்ந்து முத்தம் வைத்தால்

பூனைக்குட்டிபோல் பசுந்தாய் நிற்பாள்

புண்ணியம் செய்ததாய் பூரிப்படைவாள்

காதலில் விழுந்திட யார் செய்தார் செய்வினை

2011-07-03T10:30:00.002+05:30

பனி படர் இரவினில்

தனித்திடும் கற்பனை

காதலில் விழுந்தவர்

கண்களில் ஏது நித்திரை

சிரித்திடும் இதழ்களில்

காதலின் சொற்சுவை

மூச்சுக்கு ஒருமுறை

அவள் நாமம் அர்ச்சனை

நெஞ்சுடன் அணைத்திட

வேண்டும் ஒரு தலையணை

நித்தமும் கொடுத்திடும்

முத்தம் தான் எத்தனை

நிலவுடன் கதைதிடும்

கவிஞனின் சிந்தனை

காதலில் விழுந்திட

யார் செய்தார் செய்வினை

தனியாக காத்திருப்பேன்

2011-06-27T09:30:00.000+05:30

கருமேகம் புடைசூழும் நீலவானம்

சிறுபறவை கூச்சலிட்டு

ஓடித்திரியும்

இதமான குளிர்காற்று

உடல் வருடும்

எங்கோ இருக்கும் உன்னை

இதயம் தேடும்

சிறு துளி மழையாய்

நிலம் தழுவும்

சிலிர்திருந்த புல்லினம்

அதில் நனையும்

ஒருமுறை பார்பதற்க்கு

காத்திருக்கிறேன்

தோளிலே கைபோட்டு

நடக்கவுள்ளேன்

நெஞ்சை நிமித்தும் கோபுரங்கள்

வானைத்தொடும்

இயந்திரமாய் மனிதர் கூட்டம்

ஓடிப்போகும்

நெஞ்சிருக அணைத்து ஒரு

முத்தம் வைக்க

சன நெரிசலிலே தனியாய்

காத்திருப்பேன்

காற்றாக பறந்துவரும்

தொடரூந்தில்

கதவு தானாக திறந்த்ததும்

உன் வாசம்

பேசாமல் மென்மையாய் நீ

இறங்கிவர

கண் சோராமல் உனையே

பார்த்து நிற்பேன்

சூடாக்கும் உதடுகளை

தேநீர் கோப்பை

செய்தி தானாக சொல்லிவிடும்

கண்ணின் ஆசை

தனியாக இருக்கின்ற

ஒவ்வொருநாளும்

உனை தரிசிக்கும் சந்தர்ப்பம்

வேண்டுமடி

உடல் இல்லாமல் உயிர் வாழ்வது

2011-06-19T09:23:00.000+05:30

உடல் இல்லாமல் உயிர் வாழ்வதும்

உயிர் இல்லாமில் உடல் வாழ்வதும்

சிறை இல்லாமல் சிறை ஆவதும்

சிறைக்குள்ளேயே விடுதலை ஆவதும்

பிணம் இல்லாமல் கிரிகை செய்வதும்

இறுதி வரை பிணமாக இருப்பதும்

கண்கள் இல்லாமலே கண்ணீர் விடுவதும்

கண்ணீர் வற்றிய கண்ங்கள் இருப்பதும்

உணர்வில்லாமல் ஊமையாவதும்

ஊமையே உணர்வாவதும்

வன்னி மண்ணில்

அல்லது

தமிழ் இனத்தில்

அல்லது

மேற்கூறிய இரண்டிலும்

உன்னையே நீ மறந்திடுவாய்

2011-06-12T13:50:00.000+05:30

தடாகத்து தாமரையோ

தரணியில் பூத்த தேவதையோ
தங்கத்தில் கடைந்தெடுத்த

தளததளக்கும் பெண்தானோ

காதல் ரசம் சொட்டுகின்ற

கண்களில் காமம் இல்லை

தேவை தேடும் இதழ்களில்

தாகங்களின் சுவை எத்தனை

நீர் எடுத்து ஆடி வந்தால்

குளிர்கின்ற பூந்தளிர்
நெஞ்சோடு அணைத்தெடுத்து

முத்தம் தரும் சுவை தனி

பஞ்சு மெத்தை மிஞ்சிவிடும்

பதை பதைத்து கொஞ்சிவிடும்
வஞ்சி உன்னை காண்பதற்கு

கண்கள் இரண்டும் கெஞ்சிவிடும்

பாதம் தொட்டால் சிலிர்திடுவாய்

முத்தம் தந்து சுளுக்கெடுப்பாய்

உயிர் தேடும் நினைப்பினிலே

உன்னையே நீ மறந்திடுவாய்

கடல் மடியில் உயிர் வாடும்

2011-06-05T11:30:00.000+05:30

நுரை தவழும் கடல் அலைகள்

தரை மீது மோதும்

மணல் தரையில் சிறு நண்டு

மறைந்து விளையாடும்

இருள் அகற்றும் சூரியன்

அந்தப்புறம் போகும்

எம் வாழ்வினிலே விடியல்

எப்ப வந்து சேரும்

நான் படகெடுத்து போகையிலே

பாவி உயிர் போகும்

இரவினிலே கடல் மடியில்

தனிமையில் உயிர் வாடும்

வழி அனுப்பியவள் காத்திருப்பாள்

கடவுளின் துணையோடு

நான் கடல் கிழித்து வரும்போதே

அவள் கண்களில் உயிர் சேரும்

எங்கிருந்தாலும் தொடரும் நட்புறவு

2011-05-31T11:16:00.000+05:30

நீண்டதோர் வாழ்கை பயணம்

நிலைத்திடா உயிர்கள் இணையும்

உறவுகளின் உச்ச சங்கமம் - தொடர்

கதையாய் போகும் உற்சவம்

இடையிலே சேரும் பல உறவு

பாதியிலே முறியும் சில உறவு

உயிருடன் சேரும் ஒரு கனவு - அது

இறுதி வரை வரும் ஒரு உறவு

பணத்தாலே சேரும் பல உறவு

குணத்தாலே சேரும் சில உறவு

ஆபத்தில் உதவுவது எந்த உறவு - அது

எங்கிருந்தாலும் தொடரும் நட்புறவு

நாகரிகமற்ற வாழ்க்கை

2011-05-22T15:50:00.001+05:30

வேதனையின் வடுக்கள்

கொடுமையின் ஆட்சி

சின்னபின்னமான உயிர்கள்

சிவந்து நிற்கும் கண்கள்

கேவலம்

எம்மால் முடியவில்லை

பிச்சை ஏந்தும் கைகள்

சாகவும் மனமில்லை

வாழவும் பிடிக்கவில்லை

நப்பாசையில் நகரும்

நாகரிகமற்ற வாழ்க்கை

நாளைய தலைமுறைக்கு

விட்டுச்செல்ல ஒன்றுமில்லை

காதலிச்சவன் காத்திருக்கிறான் சிறைக்குள்ளே

2011-05-15T13:47:00.001+05:30

புளியமரத்தடி பிள்ளையார் கோவில்

பொங்கல் பானையில் கட்டிய பட்டு

சின்னஞ்சிறுசுகளின் எட்டுக்கோடு

சிரித்துக்கொண்டே நீ சுடும் வடைகள்

தீர்த்த குளத்தின் தாமரை மலர்கள்

தீண்டாமல் தீண்டும் இலைகளில் நீர்கள்

பார்த்து விட்டு போகும் உன்னுடைய அம்மா

பார்த்துக்கொண்டே இருக்கும் என்னுடைய கண்கள்

படையல் முடிந்ததும் படிக்கும் தேவாரம்

உன்னை நினைத்தே பூசும் வீபூதி

சாம்பிராணி புகையின் நறுமண புகை

வென்றுவிடும் உன் கூந்தலின் வாசனை

காதலை சொல்ல காத்திருந்த தருணம்

கண்களால் பேச பாத்திருந்த புருவம்

காலம் கூடாமல் வந்த இடப்பெயர்வு

வாழ்வில் சேராமல் போன நம் காதல்

உன் இடுப்பிலே இப்பொழுது சிறுபிள்ளை

கைதியாய் இருக்கின்றேன் நான் சிறைக்குள்ளே

கட்டியவன் செத்தான் போரினிலே

காதலிச்சவன் காத்திருக்கிறான் சிறைக்குள்ளே

நான் உரைக்கும் கவிதைகள்

2011-05-08T12:55:00.004+05:30

சிந்தனைகளே
கவிதையின் ஆசான்

கற்பனைகளே
கவிதையின் வகுப்பறை

சொற்கள்களே
வகுப்பறை பாடங்கள்

உணர்வுகளே
எழுதுகோலின் மைகள்

உண்மையே
நான் உரைக்கும் கவிதைகள்

தொடருகின்ற மௌனம்

2011-05-01T14:15:00.002+05:30

பனி படர்ந்த வானம்

முகில் புக முனையும்
யன்னல் கதவு

சில நிமிட யோசனை
சிலிர்க்வைக்கும் நினைப்பு
சிலையென நீ

ஒருநிமிட மௌனம்

ஓரக்கண் பார்வை

ஒரு விரல் ஸ்பரிசம்

கனத்திடும் கனவு

கலைந்திடும் கூந்தல்

கால்களால் கோலம்

வியக்கவைக்கும் அழகு

வியர்த்துகொட்டும் குளிர்

விடை தேடும் விழிகள்

சொல்லிவிடவா காதலை

மூன்று முறை முயற்ச்சித்தும்

மூச்சு விட முடியாமல்

தொடருகின்ற மௌனம்

பிறந்தவர் இறந்தவர் - இறந்தவர் பிறந்தவர்

2011-04-25T10:39:00.000+05:30

தோன்றலும் மறைத்தலும்

வாழ்கையின் நியதி

தோன்றினால் வாழ்வது

இயற்கையின் விதிப்படி

தோன்றமுன் இறப்பது

கருப்பையினுடன் முடிகிறது

வாழ்ந்தபின் இறப்பது

சுடலைவரை செல்கிறது

வாழ்ந்தபின் இறந்தவர்

பாவத்துடன் மறைகிறார்

தோன்றும்போதே இறந்தவர்

பாவமாகவே பிறக்கிறார்

வாழ்வதை நோக்கி

பிறந்திடும் உயிர்கள்

சாவது வரும்வரை

வாழ்வது இல்லை

விடுதலை வேண்டி

இறந்திடும் உயிர்கள்

இறந்த பின் கூட

சுதந்திரம் இல்லை

சுற்றுகின்ற சூட்சுமத்தில்

சிக்கிவிடும் உயிர்கள்

தத்தளிக்கும் நிகழ்வே

பிறப்புதும் இறப்பதும்

ஊணமுற்ற நிர்வாணம்

2011-04-17T14:57:00.003+05:30

முடிவு செய்யப்பட மூச்சுக்காற்று

வரையறுக்கப்பட்ட மூக்குத்துவாரம்

வாயைத்திறந்தால் மரண வெடி

மனிதர்களை மந்தையாக்கும்

மாண்புமிகு அரசியல்

மனித உரிமையின் பிறப்பிடத்தில்

கருச்சிதைவு

மறக்கமுடியா மனித படுகொலையை

வரவேற்க்கும் நாடுகள்

என்றைக்கும் சுயநலத்தில்

உயிர் குடிக்கும்

ஊணமுற்ற நிர்வாணம்

நான் செத்து செத்து பிழைக்கிறேன்

2011-04-10T14:40:00.000+05:30

நான் நினைத்த காதல்
நீ அறிந்த போதும்

நானத்தில் குனிந்து
கோலம் இட்ட போதும்

தேன் இனிக்கும் உதட்டில்
தீந் தமிழ் நழுவும் போதும்

குளிர் நிறை கண்கள்
மடல் விசுறும் போதும்

காணமுடியா இடை
தாளமிடும் போதும்

காற்றிலே சேலை
வானவில்லான போதும்

நான் செத்து செத்து பிழைக்கிறேன்
உனை தொட்டுவிட துடிக்கிறேன்

கொதித்திடும் இரத்தம் கொள்

2011-04-03T18:55:00.000+05:30

உயிர் கொண்டு எழும்பு

உன் உரத்தினை கூட்டு

எதிர்கொள்ளும் தடைகளை

எதிர்த்து நீ தாக்கு

நெஞ்சத்தில் உறுதிகொள்

உன் நேர்மையை உணர்ந்துகொள்

பஞ்ச்சத்தில் இருந்தாலும்

உன் பாதையை நினைவுகொள்

சிவந்திடும் கண்கள் வை

சீறிடும் சொற்கள் செய்

நரம்புகள் நாடிகள் எல்லாம்

கொதித்திடும் இரத்தம் கொள்

நீண்டதோர் பார்வை காண்

நிலைத்திடும் சிந்தை கேள்

நினைப்பதை செய்துமுடி

நிமிர்ந்திடும் உந்தன் கொடி

கோடித்தவிப்பை மூடிவைத்து

2011-02-14T06:35:00.000+05:30

தேடி வந்த காதலும்
தேடிச்சென்ற காதலும்
மோதிக்கொண்ட இடமெது
மோத வைத்த மனமெது

கோடித்தவிப்பை மூடிவைத்து
கோடு போட்டு வாழ்ந்திருந்து
நாடிச்சென்ற நேரமெது
தாவிச்சென்ற இதயமெது

சோடி போட்டு வாழ்வதற்கு
சோடி சேர காத்திருந்து
செய்தி சொன்ன வார்த்தை எது
செய்தி வந்த உதடு எது

கூவிக் கூவி விற்பதற்கு
குவித்து வைக்கும் பொருளுமல்ல
தானாக வந்ததிது
தவிற்பவற்கே சொந்தமிது

நிலைத்தலுகான போராட்டம் தொடரட்டும்

2011-02-07T17:40:00.000+05:30

விடியல் புலர்வது விடிவுக்கல்ல

இருட்டினில் விடிவி கிடைப்பது இல்லை

மறைந்தது இன்று சூரியனானாலும்

உதிப்பது நாளை சுட்டெரிக்கட்டும்

மறைவெல்லாம் மறைந்த்தவை அல்ல

மறைந்த்ததும் வாழ்வு இருல்வதில்லை

நினைவுகள் எல்லாம் கொடுமை அனாலும்

கனவுகள் என்றும் நிமிர்ந்திருக்கட்டும்

உயர்வுகள் எல்லாம் உயரமான்தல்ல

வீழ்ச்சிகள் இன்றி உயர்ந்தவர் இல்லை

நினைப்பது இங்கு நடக்காவிடினும்

நிலைத்தலுகான போராட்டம் தொடரட்டும்

ஈழம் தமிழர் நாடு

2011-01-28T10:12:00.000+05:30

ஈழம்

தமிழர் நாடு

உலகம்

அவர்கள் வீடு

காதலியின் கவிதை

2011-01-24T19:20:00.000+05:30

உந்தன் காதல் எந்தன் உள்ளே உரசி செல்லுதே

உரிமையோடு என்னை சுரண்டி இனிமை காணுதே

உந்தன் நெஞ்சில் தலை சாயந்து இருக்கும் நேரம்

எந்தனுள்ளே பட்டாம்பூச்சி பறந்து செல்லுதே

பக்கம் நின்று பேசும் பொது பரிதவிக்கிறேன்

தொட்டு விட்டு செல்லும் போது சிலிர்ப்படைகிறேன்

பார்வையாலே நூறு கோடி பரிசம் தருகிறாய்

பாவப்பட்ட உதட்டினிலே முத்தம் தருகிறாய்

வெட்கப்பட்டு நிற்கும்போது இறுக்கி அணைக்கிறாய்

இதழ்கலாலே எனைவருடி இணங்க வைக்கின்றாய்

மோகத்திலே சிக்கி கொண்டு முக்தி அடைகிறேன்

எனை சொர்கத்துக்கு கூட்டி செல்லும் கடவுளாகிறாய்

காதலித்தே காதலித்தே கொல்லப்போகிறேன்

2011-01-19T07:45:00.001+05:30

கோவப்பட ரோஜா முகம் சிவந்து போனதோ

கஷ்டப்பட்டு கோவப்பட்டால் உதடு சிரிக்குதோ

முகத்தை திருப்பி முறைத்து பாத்தால் கோவமாகுமோ

முத்தம் ஒன்று தந்துவிட்டால் கோவம் போகுமோ

நித்தம் உன்னை காதலிக்கவே கனவு காண்கிறேன்

நிம்மதியை தரத்தானே சேவை செய்கிறேன்

அன்புகொண்ட நெஞ்சில் கோபம் ஏன் முளைத்தது

ஆரதழுவ வேண்டும் எண்டு மனசு சொல்லுது

உன்னை மட்டும் நினைப்பதற்கே ஜீவன் கேட்கிறேன்

உண்மை உள்ள காதல் நெஞ்சை அள்ளித்தருகிறேன்

அன்பில் வளர்ந்த காதலையே சொல்லத் துடிக்கிறேன்

உன்னை காதலித்தே காதலித்தே கொல்லப்போகிறேன்

எனை ஏங்க வைக்கும் ஊடலென்ன

2011-01-17T08:35:00.000+05:30

வயலோர வரப்பினிலே
சிலையாக நடந்தவளே
அலையாக காற்று வர
உன் அசைவாலே பாட்டுவர
நான் புயலான மாயமென்ன
புடம்போட்ட தேகமென்ன

ஏர் பிடித்த மாடுகளோ
சீர்படுத்தி நிலம்பிளக்க
தேனான மழைத்துளிகள்
உடல் முழுக்க பரவிவிழ
கோடான விளைச்சலுக்கு
ஏங்கிநிற்க்கும் ஏழை என்ன

கந்தாங்கி சேலை கட்டி

கை நிறைய வளையளிட்டு

பெண் தாங்கும் இடையாலே

பந்தாடி செல்கையிலே

உரம் போடா வயலினிலே
நெல் தானாக முளைத்தென்ன

நான் ஏன் பதிவெழுத வந்தேன் (தொடர் பதிவு)

2011-01-14T09:40:00.003+05:30

உவன் தம்பி சுதாக்கு வேலையில்ல சிவனே எண்டு இருந்த என்ன மாட்டிவிட்டிடான்

தம்பி சுதா வின் வேண்டுகோளுக்கு இணங்க இந்த கட்டுரை. இதுதான் கடைசி. எனது பிளாக்கரில் இனி கவிதை மட்டுமே வெளியிடப்படும். இது சத்தியம். (ஏனெண்ட அது தான் இலகு பந்தி பந்தியா அடிக்க தேவையில்லை ).

வன்னியில் இருந்து ஒரு கடிதம் வந்தது பிளாக்கர் ஆரம்பிகச்சொல்லி.

2008 மார்கழி மாதம் இந்தியா சென்றபோது பிளாக்கர் சமந்தமாக கனடாவில் இருந்தது வந்த அண்ணா coumputer தெரிஞ்ச மச்சானோட கதைத்தார். அப்பொழுது ஒன்றும் புரியவில்லை. நான் சும்மா பக்கத்தில கேட்டு கேட்டு கொண்டு தலையை ஆட்டி ஆட்டி கொண்டு இருந்தான். பெரிய பெரிய ஆக்கள் எல்லாம் பிளாக்கர் வைத்திருக்கிறார்கள் கவிதை போடுகிறார்கள் என்றார். அப்பவே மனதுக்குள்ள முடிவெடுத்திட்டன் நானும் ஒரு பிளாக்கர் திறக்குரதான் என்று .சிறுவயதில் இருந்து கொப்பியில் எழுதிவைத்த கவிதைகளை போடலாம் ஆனால் பெரியாட்களுக்கு முன் எனது கவிதை எடுபட வேண்டுமென்றால் பெயரிலாவது பெரியாள் போல் காட்டவேண்டும் என சிந்தித்தேன். சிந்த்திதுகொண்டே இலங்கை வந்தேன். அதனால் தான் கவி கிழவன் என பெயர் வைத்தேன்

இலங்கைக்கு வந்து அடுத்த நாள் அலுவலகம் சென்றேன். மேசையில் ஒரு கடிதம். இதோ கடிதம் . ஒரு சில காரணங்களுக்காக பெயர்கள் மறைக்கபட்டுள்ளது .

வன்னி வள்ளிபுனத்தில் இருந்து ஒரு கடிதம் வந்தது பிளாக்கர் ஆரம்பிகச்சொல்லி.கொஞ்சம் அதிகம் தான் அப்படியே தருகின்றேன் .

ஆச்சரியம் கணணி பாவனை குறைந்த வன்னியில் இருந்து இந்த இடம்பெயர்வுக்குளும் பிளாக்கர் சமந்தமாக Colombo இல் இருக்கும் எனக்கு எழுதுகிறார். ஆரம்பிதேன் 16 17 வயதில் இருந்து யாருக்கும் காட்டாது எழுதிவைத்த கவிதைகளும் பல்கலைகழக சுவர்களில் எழுதிய கவிதைகளும் புதிதாக எழுதுகின்ற கவிதைகளும் என கவிதைகளை பிரசுரிதேன்.

பாமினியில் மட்டும் type பண்ண தெரியும் அந்த துணிவில பிளாக்கர் ஆரம்பித்தான். நானே ஒன்று திறந்தேன் அது சரி வரல பிறகு மச்சானின்ட உதவியோட அவன கேட்டு கேட்டு துறந்தான். அவன் எங்கள் வீட்டில் இருந்து படிச்சபடியா வசதியா போட்டு. டெம்ப்ளேட் வடிவமைப்பு எல்லாம் சொல்லித்தந்தான்.எல்லா கவிதையையும் word ல அட்டிச்சன். நல்ல காலம் மச்சான் சொன்னான் unicod font தான் பிளாக்கர்ல போடலாம் என்று. அத எப்படி மாத்திரதென்ட்டு சொல்லித்தந்தான். ஒரு மாதத்திற்கு 10 கவிதை போடிரதுதான் அரம்பத்தில திட்டம் . அடுத்தடுத்து 10 கவிதையையும் போட்டன் . அப்படி 2 மாசம் போட்டன். thamilish ல இணைக்கவில்லை . இன்னும் என்ட கவிதைகள் சில தமிளிஸ்ல வராம இருக்கு . மச்சான் தான் எனக்கு thamilish இல இணைகிற முறை சொல்லித்தந்தான் . அவன் தான் vote போடுற கருத்து போடுற நுட்பங்கள் சொல்லித்தந்தான். எதாவது சந்தேகம் என்றால் உடனே தொடர்பு கொள்வது அவனைத்தான் . அவன் வேறு யாருமல்ல http://www.tamilhackx.com/ பிளாக்கர் உரிமையாளர் சயந்தன்.

என்ன பகிடி ஏன்டா விசிட்டர்ஸ் flag counter பொட்டுடன எங்க எங்க இருந்தெல்லாம் அகல் பக்கிரினம் எண்டு விழுந்திச்சு . எனகேண்டா சந்தேகம் அரம்பத்தில . என்ட கவிதையை இவ எல்லாம் பாபினமோ உது சும்மா பொய் சொல்லுது என்டு நினைச்சன் . பிறகு தான் கம்ப்யூட்டர் பொய் சொல்லாது எண்டு விளங்கிச்சு .

எனது கவிதைகளை பார்க்க உயிருடன் வருவாரா வந்தாலும் முகாமில் இருந்து எப்ப வந்து எப்ப பார்பார் என்ற ஏக்கம் மனதுக்குள் இருந்துகொண்டே இருந்தது .

வந்தார் குடும்பத்துடன் ஒருவித பிரச்சனையும் இன்றி. முகாமில் இருந்தார் தொடர்பு கொண்டார். இப்பொழுது முகாமில் இருந்து வெளியில் வந்து எனது 100 வது படைப்புக்கு ஆசியும் எழுதி தந்தார் . அவர் வேறு யாருமில்லை பூங்கோதை படைப்புகள் http://www.poonka.blogspot.com/ பளோகரின் சொந்தகாரி .இப்பொழுது லண்டன் சென்றுவிட்டார் . அவரது ஆசி கவிதையை பார்க்க

http://kavikilavan.blogspot.com/search/label/%E0%AE%AA%E0%AE%BF%E0%AE%B3%E0%AE%BE%E0%AE%95%E0%AF%8D%E0%AE%95%E0%AE%B0%E0%AF%8D%20%E0%AE%A4%E0%AF%8A%E0%AE%9F%E0%AE%99%E0%AF%8D%E0%AE%95%E0%AE%BF%E0%AE%AF%20%E0%AE%95%E0%AE%A4%E0%AF%௮௮

இந்த லிங்குக்கு செல்லவும். ஒரு மாதிரி 161 கவிதை எழுதிட்டன். நிலா மதி அக்கா தான் முதன் முதலில் தனிபட்ட முறையில் தொடர்பு கொண்டவர். வாழ்த்தினவர். அவரையே இதை தொடர அழைக்கிறேன் .
நிலா மதி அக்கா நிலா மதி அக்கா எங்கிருந்தாலும் உடனே கரியாலியதுக்கு வரவும் உங்களுக்கு பொங்கல் காத்திருக்கிறது . இப்படிக்கு ஆலய பரிபாலன சபையினர்

பெண்ணுக்கு தேவை எப்பொழுதும் ஊடல்

2011-01-10T17:45:00.001+05:30

இருதயம் என்பது இடைவிடாத் துடிப்பு

இதழ்களின் ஓரம் உதிர்ந்திடும் சிரிப்பு
கண்ணினை இமை காத்திடும் பொறுப்பு
காதலில் விழுந்தோர் வாழ்வினில் நெருப்பு

பார்க்கத்துடிக்கும் எண்ணத்தின் வேகம்
பார்த்த உடனே கன்னத்தில் ஈரம்
பேசநினைத்த உதடுகள் போட்டி

வார்த்தை இல்லாமல் நடந்திடும் சூழ்ச்சி

கைகள் இரண்டிலும் விரல்களின் ஆட்சி
வெட்கம் என்பது காதலின் சாட்சி
தூர நிற்பது பெண்மைக்கு அழகு
துரத்தி செல்வது ஆண்களின் இலக்கு

சொல்லவருவதை மெல்வது காதல்
சொல்லாததை செய்வது கூடல்

பெண்ணுக்கு தேவை எப்பொழுதும் ஊடல்
ஆண்களின் வெற்றி ஊடலில் ஆள்தல்

கிராமத்து காதல்

2011-01-05T10:40:00.002+05:30

கிராமத்து வீதியிலே
வெறுங்காலுடன் நடக்கையிலே
வேலிக்குள் சத்தம் கேட்கும்
எட்டிப்பார்த்தால் வெட்கப்படும்

சீத்தை துணி உடுத்திரிப்பாள்
சிங்காரமாய்த்தான் அவளிருப்பாள்
இரட்டைப் பிடி கட்டினாலும்
ஒற்றை மனதுடன் காத்திருப்பாள்

முற்றம் கூட்டும் சாக்கினிலே
முத்தம் கேட்டு வந்திடுவாள்
கன்னம் சிவக்க முத்தமிட்டாள்
கண்களாலே காதல் தருவாள்

தண்ணி அள்ள போகையிலே
தனியாக கூப்பிடுவாள்
தாகம் தீர்க்க தண்ணி தந்து
காதல் தாகம் தீர்த்திடுவாள்

கோவிலுக்கு போகையிலே
கொலுசு ஒலி பாதையாகும்
அவள் வாழ நான் தொழுவேன்
அவள் கண்களுக்கு கீழ் தவமிருப்பேன்

சுழன்றிடும் உலகில் உயிர் பெற்றிடும் நாடு

2010-12-06T00:36:00.002+05:30

நடை பிணமானோம்
நாட்டினை இழந்தோம்
வெட்கமின்றியே
மூச்சினை விடுறோம்

சுதந்திரம் இல்லை
சொந்தமண் எங்கே
சிறையினில் வாழும்
வாழ்வில் பயனில்லை

உயிர்களை இழந்தோம்
உடைமைகள் தொலைத்தோம்
உண்மையை சொன்னால்
சாக சடம் ஆனோம்

மற்றவர் கையை
நம்பியே கெட்டோம்
மானத்தை தொலைத்த
மனிதர்கள் ஆனோம்

இலச்சிய தாகம்
சூழ்ச்சியால் சாவு
சுழன்றிடும் உலகில்
உயிர் பெற்றிடும் நாடு

கார்த்திகையில் ஒரு தீபம் மனதில் ஏற்றுவோம்

2010-11-27T20:54:00.006+05:30

வட துருவத்தில்

ஓளி அணைந்ததால்
உலகிலேயே இருள் சூழ்ந்தது

நீர் சொரியும்
கண்களிலேலாம்
ஒரு ஒருவம் தெரிந்தது

இறுதி முச்சும்
இனத்துக்கே
என்ற இறுமாப்பு கொண்டவன்

இதயம் எல்லாம்
ஓளி ஏற்றும்
உலகம் படைத்தவன்

அவன் இனத்தில்
பிறந்ததற்காய்
நெஞ்சை நிமிர்துவோம்

கார்த்திகையில்
ஒரு தீபம்
மனதில் ஏற்றுவோம்

உன்னில் தலைசாயா ஆசையடா

2010-11-25T21:00:00.000+05:30

முற்றத்து மரங்களிலே
முக்கனிகள் பழுத்திருக்க
சுற்றத்து கண்களெல்லாம்
கனி பறிக்க காத்திருக்க

ஊர் சுற்ற வந்த மச்சான்
எனை பறித்து போனதென்ன
என் மனதிற்குள் புகுந்ததென்ன
மனசோடு சேர்ந்ததென்ன

மரம் சுற்றும் கிளிகளெல்லாம்
பழம் தின்ன வந்ததென்ன
உனைப்பார்த்த பின்னாடி
மனம் மாறிப்போனதென்ன

தலைவாசல் ஓரத்தில்
விழி பார்த்து வீற்றிருந்தேன்
உன் வழிகான காத்திருந்தேன்
உன் மனம் சேர தவமிருந்தேன்

கிளி பார்த்த போதினிலே
கனி ஆசை கொள்ளுதடா
எனைக்கடிகாமல் விடுவாயோ
தவிப்பாக உள்ளதடா

உன்னில் தலைசாயா ஆசையடா

காதலின் குழந்தைகள் சொர்க்கத்திற்கு சொந்தமாக

2010-11-22T21:57:00.002+05:30

இளம் கீற்றின் சுகம்
காற்றின் வழி வந்து
விழி மூட

இதயத்தின் இசைமீட்டல்
மெல் இதமாக
சுகம் சேர்க்க

என் சுவாசக்காற்று
உன் உடல் வருடி
சிலிர்க்கவைக்க

காதலின் குழந்தைகள்
சொர்க்கத்திற்கு
சொந்தமாக

????????????????
???????????
??????

காலையில் சூரியன்
உத்திதான்
சோம்பல் முறித்து

வாழ்விலும் நீயே சாவிலும் நீயே

2010-11-17T23:19:00.003+05:30

நித்தமும் உன்னை தொட்டிடதானே
நெஞ்சினில் காதல் வளர்த்தேன்

சொல்வதும் ஒன்று செய்வதும் ஒன்று
இதழ் கூப்பிடதானே துடித்தேன்

பெண்மையே உன்னை போற்றிடதனே
கண்களின் இமைக்குள் வைத்தேன்

பிறந்ததும் எனக்கு வளர்ந்ததும் எனக்கு
உன்னை தாங்கிடும் பொறுப்பை ஏற்றேன்

சொந்தமாய் உன்னை மாற்றிடத்தனே
சொர்கத்தை இங்கு படைத்தேன்

வாழ்விலும் நீயே சாவிலும் நீயே
உயிர் கொடுக்க நான் பிறந்தேன்

கருத்துகள் வாக்குகளை தீர்மானிக்கும் ,வாக்குகள் கருத்துகளை தீர்மானிக்கும் சனநாயக பிச்சை .

இதயம் வரை காதல்

2010-11-14T21:41:00.000+05:30

என் படுக்கையறை
கனவுகளின் தோட்டம்
நீண்ட இரவுகள்
வேதனையின் ஆளம்

இரு விழிகளும்
சூரியனின் சொந்தம்
இதயம் வரை
காதலின் வேதம்

இணைவதுதான்
வாழ்கையின் ஞானம்
இல்லையேல்
உயிர் தானாக சாகும்

வசியமில்லா காதலால் ருசிக்கமுடியா இரவுகள்

2010-11-09T21:59:00.005+05:30

கடல் புரண்டு தரையானாலும்
மனம் உடைந்து துரும்பானாலும்
பிடிவாத குணம் படைத்தாய்
பிழையானத்தை ஏன் தொடுத்தாய்

உடலிலே ஒன்றுமில்லை
மனசும் உணர்வும் இரண்டும் உண்மை
தடையாக ஏன் நினைத்தாய்
தடுக்காமல் ஏன் துடித்தாய்

பிரிவென்றால் விருப்பமில்லை
சேர்ந்துவாழ முடியவில்லை
எதற்காக் இணைத்துக்கொண்டாய்
இணைந்தபின் ஏன் உதைந்தாய்

கனவாக நினைக்கவில்லை
கனவுகான பிடிக்கவில்லை
தெளிவாக சொல்லுகின்றேன்
உனைவிட்டால் வாழ்வு இல்லை

நீ ஆணாக பிறந்ததனால் அப்படி என்ன கண்டுவிட்டாய்

2010-10-27T21:59:00.005+05:30

உதட்டோரம் விழுவதெல்லாம்
உணர்வுள்ள வார்த்தைகளே
என் கழுத்தோடு கொடிகட்டி
துணையாக தொட்டது ஏன்

உனக்காக மாறவேண்டும் என
நீ எதற்காக நினைக்கின்றாய்
நீ ஆணாக பிறந்ததனால்
அப்படி என்ன கண்டுவிட்டாய்

எனக்கென்று தனி உணர்வு
அதற்குள்ளே பெரும் கனவு
அதை உணரக்கூட தெரியாமல்
ஆணாக ஏன் பிறந்தாய்

உடலிலே வலிமை கொண்டு
உணர்விலே வன்மைகொண்டு
அழகான பெண்மை என்னை
அடக்கி ஆள ஏன் வந்தாய்

மிருகம் எனக்கு தேவையில்லை
மீதி வாழ்வு பாரமில்லை
வேகமாக நான் எழுந்திடுவேன்
மிக உயரத்துக்கு சென்றிடுவேன்

காமம் கொண்ட கண்களினால் சேலை உரிந்து போகின்றது

2010-10-14T22:00:00.000+05:30

நான் உரைக்க போவதெல்லாம்
நாவிலுள்ள உண்மைகளே

நலிவுற்று இருந்தாலும்
தளராத உறுதியுடன்
மெலிவுற்று இருந்தாலும்
கலங்காத கண்களுடன்

ஒரு சேலை தலைபெடுத்து
உடல்முழுக்க சுத்திவிட்டு
மானத்துடன் நிமிர்கின்ற
மறத்தமிழ் பெண்மணி

ஊர் விட்டு ஓடிவந்து
உற்றவரை நான் இழந்து
கைக்குழந்தை கதறலுடன்
கை ஏந்தி நிற்கின்றேன்

ஒருமுறை பசி போக்க
ஒன்பது இடம் ஏறிவிட்டேன்
ஒவ்வொரு இடமும் புதுசெனக்கு
ஒவ்வொரு கதையும் பழசெனக்கு

பிள்ளை ஒன்றை கையிலேந்தி
பிச்சை கேக்கும் போதிலும்
காமம் கொண்ட கண்களினால்
சேலை உரிந்து போகின்றது

தமிழினம் ஆண்டிடும் நாடு

2010-10-10T22:54:00.006+05:30

நாவினில் ஊரும் நற்றமிழ் கவிதை
பாவினில் புலம்பும் சொற்களின் இனிமை
வாழ்வினில் கிடைக்கும் அனுபவக்கோவை
வந்திடும் கவிதையாய் செந்தமிழ் மேடை

தமிழினும் இனிது உலகினில் இல்லை
தமிழினை கொள்பவர் உலகினில் கொள்ளை
சுழன்றிடும் நாவில் சுட்டிடும் உண்மை - செந்
தமிழினை காத்திட நெஞ்சினில் வன்மை

நெஞ்சினில் குண்டு பாய்ந்திடும் போதும்
செத்துமே உடல் சாய்ந்திடும் போதும்
செவ்விதழ் உதடுகள் தமிழென உரைக்கும்
தமிழினை காத்திட இரத்தத்தை இறைக்கும்

சத்தியம் என்பது சரித்திர உண்மை
வேள்விகள் செய்வது தமிழனின் கொள்கை
உண்மைகள் ஒரு நாள் சுட்டிடும் போது
தமிழினம் எழுந்து ஆண்டிடும் நாடு

கருத்துகள் வாக்குகளை தீர்மானிக்கும் ,வாக்குகள் கருத்துகளை தீர்மானிக்கும் சனநாயக பிச்சை .

காதலால் ஆதலால் கண்

2010-10-03T22:47:00.002+05:30

10 வயதில்

காற்றிலும் நான்
கவனமாகத்தான் போகிறேன்
கண்களுக்குள் தூசு போகாமல்

18 வயதில்

காற்றிலும் நான்
கவனமாகத்தான் போகிறேன்
உனை பார்க்கும் கண்களுக்குள்
தூசு போகாமல்

28 வயதில்

காற்றிலும் நான்
கவனமாகத்தான் போகிறேன்
உன் கண்களுக்குள் தூசு போகாமல்

38 வயதில்

காற்றிலும் நான்
கவனமாகத்தான் போகிறேன்
எம் செல்லகண்ணின்
கண்களுக்குள் தூசு போகாமல்

78 வயதில்

காற்றிலும் நான்
கவனமாகத்தான் போகிறேன்
கடைசிவரை வருபவளை
கண் கொண்டு பார்பதற்கு

என் படுக்கையறை ரகசியங்கள்

2010-09-29T13:43:00.001+05:30

தூக்கம் வந்து தூங்கவில்லை

தூங்காவிடில் கண்கள் கலங்கிவிடும்

* * *
குளிர்வதால் போர்க்கவில்லை
சோகத்தை மறைக்க போர்க்கிறேன்
* * *
சுகத்திற்கு தலையணை வைக்கவில்லை
என் கண்ணீரை உருஞ்ச வைக்கிறேன்
* * *
வசதிக்கு மெத்தையில் தூங்கவில்லை
உனை தாங்கும் நெஞ்சம் இதமாக தூங்க .....

என் தலையணை ரகசியம்

2010-09-27T21:13:00.001+05:30

என் காதல் கசங்கியது போல்
தலையணையும் கசங்கியுள்ளது
காலையில்

* * * * * * *
2

உன் நெஞ்சில்ஈராம் இல்லாததால்
என் தலையணை முழுக்க ஈராம்
முழு இரவும்

முதல் இரவில் ஒரு கவிதை

2010-09-24T21:24:00.003+05:30

செல்ல செல்ல பார்வையால்
மெல்ல மெல்ல மோதி
சின்ன சின்ன புன்னகையாள்
நெஞ்சம் வரை தாவி
கள்ள கள்ள தொடுகையால்
காதல் பரிமாறி
வெட்க்கபடும் போதினிலே
நான் வெற்றி கொண்டேன்
பூங்குயிலே

நான் பித்து பிடித்து திரிகின்றேன்

2010-09-22T21:00:00.000+05:30

சின்ன மழைத்துளி
யன்னலில் முட்டிமோதி
நெஞ்சத்தை தொட்டுப்பார்க்க

ஒற்றை உருவத்தில்
இரு விழிகள்
ஓராமாய் எட்டிப்பார்க்க

மெல்ல நடையில்
குடைபிடித்து
இடை அசைத்து போறாள்

சொல்ல வரியின்றி
சொர்க்க வரிகளை
தேடுகின்றேன்

வெல்ல வழியிருந்தும்
பித்து பிடித்து
திரிகின்றேன்

காத்திருக்கிறேன் அன்புத்தோழி

2010-09-20T13:38:00.003+05:30

பொத்தி வைத்த காதல் மொட்டு
முட்டி மோதி பூக்குதிங்கு
வெட்கத்துடன் நாணம் சேர்த்து
வெட்டும் வாளாய் குத்துது இங்கு

சொந்தக்ககனவுகள் சேர்த்துவைத்து
சொல்லவளியின்றி காத்திருந்து
சொந்தமானதும் சொல்லப்போறேன்
ஜோடி சேர்ந்து வாழப்போறேன்

தொட்ட இடத்தில் முத்தமிட்டு
தொடாத இடத்தில் கன்னமிட்டு
மொட்டு வைத்த காதல் மழையாய்
சொட்டு சொட்டாய் தூரப்போறேன்

சொந்த மன்னவன் எந்தன் மடியில்
சொர்கவைக்கும் உதடுசிரிப்பில்
சொல்லவந்ததை சொல்லிவிடுவான்
சொல்லாமலே அள்ளிவிடுவான்

நான் சித்தனாய் போனதென்ன

2010-09-16T09:11:00.003+05:30

யன்னல் வழி கண்கள் பார்க்க
காதல் வரி தானாய் கொட்ட
கவிதையான மாயமென்ன
மனதை தொட்ட காதலென்ன

சாரல் துளி எட்டிபார்க்க
யன்னல் கதவு தானாய் மூட
நெஞ்சை மூடி வைப்பதென்ன
கன்னமிட்டு பார்பதென்ன

தன்னந் தனி தனிமையிலே
சின்னவிழி பூங்குயிலே
சிலிர்த்து விட்டு போவதென்ன
நான் சித்தனாய் போனதென்ன

செந்தமிழ் நாளை ஆண்டிடும் உலகை

2010-09-15T12:47:00.002+05:30

எழுதுவது என் இலக்கு - என்
இனத்தினது பொருள் விளக்கு
அகத்தினிலே இருள் அகற்று
உண்மைக்கு நான் பொறுப்பு

செந்தமிழ் வீரம் பகை அடக்கு
சிந்திய குருதியில் தமிழ் எழுத்து
வரும்பகை முடிக்கும் படை நடத்து
தரணியில் நீயே தமிழ் நடப்பு

சாவினில் கூட தாகம் உண்டு
சரித்திரம் படைத்திடும் வேகம் இயம்பு
வீழ்தலில் வீரம் குறைவதில்லை
வீழ்தபின் உயர்ந்தவர் உலகினில் கொள்ளை

தாயினும் மேலாம் தாயக கனவு
மாண்டவர் மூச்சில் வென்றிடும் வீச்சு
சுதந்திர காற்றை சுவாசிக்கும் குழந்தை
செந்தமிழ் நாளை ஆண்டிடும் உலகை

ஆதியும் நீ அந்தமும் நீ

2010-09-06T09:55:00.002+05:30

நான் எழுத நினைத்த

கவிதை
நீ

நான் சொல்ல நினைத்த
காதல்
நீ

செம்மலர் இதழ்
தேனில்
நீ

செந்தமிழ் தரும்
பாவில்
நீ

வென்நிலா வாழும்
விண்ணில்
நீ

வீரர் நடைபோடும்
மண்ணில்
நீ

வெட்டி விளையாடும்
கண்ணில்
நீ

என்னை வெல்லவந்த
வேங்கை

நீ

புழுதியாய் போகும் மனிதன்

2010-08-30T10:20:00.000+05:30

நிலையற்ற வாழ்கையில்
நிலையானதை தேடி
விலையற்ற அன்பை
விலை கொடுத்து வாங்கும்
மூலையற்ற மனிதன்

நிறம் பார்த்து பழகி
நிலை கண்டு பேசி
நிழலான வாழ்க்கையில்
நிஜமானதை இழக்கும்
நிம்மதியற்ற மனிதன்

புறம் பேசி வாழ்ந்து
மற்றவர் குறை கண்டு மகிழ்தல்
தரம் என்று எண்ணி
நிரந்தரத்தை மறக்கும்
மந்தையான மனிதன்

பொருள் தேடி வாழ்தல்
பெரும் புகழ் என்று எண்ணி
நல் பொழுதுகளை இழந்து
புழுதியாய் போகும்

புகழற்ற மனிதன்

தமிழ் கைதியின் காதல் கவிதை

2010-08-26T20:47:00.000+05:30

அன்று

வயல்களும் வரப்புகளும் ஊடறத்துசெல்லும் ஊரிலே
எனது எண்ணங்கள் அதையும் தாண்டிச்சென்று
என்னவளின் ஊரை மேய்ந்துவிட்டு வரும்

இன்று
முட்கம்பி வேலிகளும் காவலரன்களும்
முளைத்திருக்கும் முழத்துக்கு முழம்
என் எண்ணங்களும் முடங்கிவிடும்

காதலியும் இல்லை அவள் ஊருமில்லை
கற்பனைகள் கூட கம்பிவேலிக்குள்
விடுதலை ஆகியும் பயனில்லை
சிறை கூட்டில் இருந்து சிறைக்குள் விடிவிப்பது
விடுதலையும் இல்லை

காதலே கொடுமையின் வேட்டை

2010-08-23T12:21:00.001+05:30

இரவுகளின் இருள் விளிம்பில்
கனவுகளின் கோட்டை

தனிஉருவம் விழித்திருந்து
தேடுது தன் வாழ்வை

காதலின் சந்தோசங்கள்
கற்பனையின் மூட்டை

காத்திருக்கும் நாட்களில்
காதலே கொடுமையின் வேட்டை

காதல் மொழி

2010-08-16T11:11:00.000+05:30

உருகிய நீர்த்துளிகள்

கண்களினதா

பேசிய வார்த்தைகள்
உதடுகளினதா

இதயத்தின் துடிப்பு
காதலினதா

காக்கவைத்த நான்
காதலனா

காத்திருந்த நீ
காதலியா

ஏக்கத்தின் நிமிடங்கள்தான்
காதலா

ஏங்கவைத்து பார்பதுதான்
ஊடலா

செல்லககன்னம் சிவப்பதுதான்
கோபமா

சிவந்த உதடு சிரிப்பதுதான்
கூடலா

நெஞ்சோடு தலை வைப்பது
கெஞ்சவா

அண்ணார்ந்து முகம் பார்ப்பது
கொஞ்சவா

தோளில் கை போடுவது
அணைக்கவா

தொடாமலே கண் பார்ப்பது
...........

காதலே என் தெய்வம்

2010-08-12T13:35:00.002+05:30

காதோரம் பதில் சொல்ல
காற்று காற்றுக்கென்ன வெட்க்கம்

உன் காதலை அள்ளிவந்த
மூச்சுக்கென்ன தயக்கம்

கண்களில் தெரிந்திடும்
காதலின் ஸ்பரிசம்

என் எண்ணங்களில் எல்லாம்
உன்னை கொல்லைகொள்ளும் திட்டம்

முந்துவதை நினைக்கையில்
நெஞ்சு முழுக்க தயக்கம்

முந்திவிட்டேன் அன்பே
உன்காதலே என் தெய்வம்

எம் இனமே அப்படிதான்

2010-08-11T15:56:00.002+05:30

இருண்ட வாழ்வில்

இதிகாசம் தேடும்

இடம்பெயர் அகதிகள்

எம் இனமே அப்படிதான்

சொந்த இடத்தில்தான்

இருக்கிறோம்

சொத்து சுகத்துடந்தான்

இருக்கிறோம்

எம் சொந்த உணர்வைவிட்டு

உரிமயைவிட்டு உறவைவிட்டு

உண்மையைவிட்டு - நீண்டதூரம்

இடம்பெயர்ந்துவிட்டோம்

எம் இனமே அப்படிதான்

தாசியான தமிழினம்

2010-08-10T12:02:00.000+05:30

கதறிய உள்ளங்களில்

கிளறிய வேதனைகள்

புகைந்து சாம்பலாகமுன்

முட்கம்பி வேலி வாழ்வானது

முடங்கிய உணர்வுகளில் - புது

உணர்ச்சிகள் வரமுன்னர்

சிதைந்தது எண்ணங்கள்

உயிர் கலைந்த சாவுகள்

உடலிருக்கு உயிர் இருக்கு

நரம்பிருக்கு எலும்பிருக்கு

உணர்வு தொலைத்த வெறும் கோதுகள்

இரத்தமில்ல உயிர் கோலங்கள்

கடலிருக்கு வயலிருக்கு

குளமிருக்கு நிலமிருக்கு

தொடமட்டும் முடியாத நாதாரிகள்

தொட்டாலும் கொன்றுவிடும் சூதாடிகள்

மூச்சுமட்டும் எடுக்கமுடியும்

முகம்கூட சுளிக்கமுடியா

முகம் இருக்கும் முழு முண்டங்கள்

மனம் முழுக்க இரத்த வாடைகள்

என் நிலமிருக்கு தொழிலிருக்கு

சுய கௌரவம் நிறைய உண்டு

பொத்திட்டு இருடா பரதேசி

நான் உன்னை ஆளும் இனவாசி

நான் பொருள் தருவேன்

பொதி தருவேன்

பொத்திட்டு வாங்கடா

என் ஆட்சியில் நீ தாசி

காதலால் உருகி கண்ணீர் மல்கி

2010-08-09T11:05:00.004+05:30

விழிகளின் கதிர்களில் ஏக்கம்

விரும்பியே துடிக்குது இதயம்

உதடுகள் உரசிடும் பருவம் - மனம்

காதலால் குளைந்த அருவம்

பார்கமுன் முடிக்கவா வெட்கத்தை

முடித்தபின் பார்கவா மிச்சத்தை

நினைக்கமுன் ஏங்குது கனவுகள்

நினைக்கவே மயக்குது வனப்புகள்

தடுப்பது மனம்தான் மறந்துவிடு

தற்பொழுது காதலை பெற்றுவிடு

கண்ணை மூடினால் உலகம் இருட்டு

காதலில் விழுந்தபின் கண்கள் குருடு

காதலா

2010-08-02T14:24:00.000+05:30

கொஞ்சி கொஞ்சியே

குலையவைக்கும்

உன் காதல்

நெஞ்சதூடு இதயம் தேடும்

உன் கண்கள்

மிச்சமின்றி

சுவாசித்து முடிக்கும்

உன் மூக்கு

சத்தமின்றி சல்லடைபோடும்

உன் சிரிப்பு

வெட்கமின்றி சொல்லுகிறேன்

காதலா

எனை வென்றுவிட்டு போவதே

என் வாழ்வடா

புதிதாய் காதலிப்பதற்கு

2010-07-29T11:59:00.000+05:30

அடிக்கடி கோபம் போடுகிறேன்

ஒவ்வொருமுறையும்

புதிதாய் காதலிப்பதற்கு

அடிகடி விடைபெறுகிறேன்

தவிப்பில் ஓடிவந்து

கட்டியணைப்பதற்கு

கன்னக்குழியில் காதல்

2010-07-27T13:05:00.000+05:30

உன்னை நினைத்து சிரிக்கையில்
கன்னக்குழியில்
காதல் நிறைகிறது

நட்பு

2010-07-20T11:51:00.001+05:30

நடப்புக்கு முள்ளுக்குதினாலே
நான் நனைவேன்
கண்ணீரால்

அன்புள்ள அன்னையே

2010-07-18T23:00:00.002+05:30

உணர்ந்தேன் உன் உதிரமே பால் ஆவதை

மகிழ்ந்தேன் உன் உயிரே நானானதை

தொழுதேன் உனை தாயிலும்மேலாகவே

அன்புள்ள அன்னையே

என் காதல் சோகம் எனக்கு மட்டும்தான்

2010-07-13T11:00:00.000+05:30

தோழியின் நினைவில்

2010-07-08T10:13:00.000+05:30

காதல் நிலைத்திருக்கும்

2010-07-05T11:25:00.000+05:30

காதலுக்காக சாவேன்

2010-06-30T08:30:00.001+05:30

தமிழ் இனத்துக்காய்

2010-06-03T13:56:00.001+05:30

நெஞ்சை கிழித்து

இதயத்தை எடுத்து

கையிலே கொடுப்பேன் !

ஒரு இனத்தை

அது வாழ்ந்த மண்ணில்

எச்சத்தைகூட

மிச்சம் விடாமல்

கொன்று குவித்தது

மாபெரும்

இன படுகொலை என

முழு உலகமும்

ஏற்றுக்கொள்ளுமெனில்

நெஞ்சுருகும் காதல்

2010-06-01T00:35:00.000+05:30

தலைப்பு செய்தி

2010-05-24T09:00:00.000+05:30

இறுதி பிணத்தின் புலம்பல்

2010-05-19T19:12:00.002+05:30

நான் பார்துக்கொண்டிருக்கவே

என் உயிர் பிரிவதை

என் கண்களால் பார்த்தேன்

நான் பார்க்காமலே

பல உயிர் கொல்லப்பட்டுவதை

என் காதுகளால் கேட்டேன்

மரண ஓலத்தின் மத்தியில்

சதை பிண்டங்கள் துடிப்பதை

எல்லோரும் பார்த்தார்கள்

ஒரு இனமே எரிந்து

கருகி சாவதை

உலகமே பார்த்தது

அனுதாபப்வடுவதை விட

வேறு என்னதான்

செய்ய முடிந்தது

போங்கடா நான் என்னைத்தவிர

வேறு யாரையும் நம்புவதில்லை

அடுத்தபிறப்பில்

அனியாயதமிழ் இனம்

2010-05-01T10:54:00.002+05:30

அனியாய ஐனநாயத்தில்

அகப்பட்ட தமிழ் இனம்

விடியாதவரைக்கும்

விலங்குகளுக்கு வேலை

பெண்களின் வாழ்க்கை

2010-03-22T11:05:00.000+05:30

காதலின் சாறு

2010-03-15T09:48:00.000+05:30

கடைசியில் ஒரு கவிதை

2010-03-12T09:30:00.000+05:30

காதல் இல்லா உலகில்

2010-03-09T10:35:00.000+05:30

காதலின் கண்ணீர்

2010-02-15T09:00:00.000+05:30

காதலர் கண்ணீர்

2010-02-11T11:54:00.001+05:30

காதலர் தின வாழ்த்துக்கள்

2010-02-11T09:53:00.000+05:30

உயிரை கொடுத்தது உன் பிறப்பு

2010-02-08T14:40:00.000+05:30